Ƙungiyar Inter Miami CF ta Amurka ta sanya sunan Lionel Messi a wani ɓangare na wajen zaman ƴan kallo domin girmama ƙyaftin ɗin Argentina.
Filin wasan ƙungiyar da ke jihar Florida na iya ɗaukar mutane kusan 26,700.
Messi mai shekara 38, wanda ya lashe FIFA World Cup 2022 a Qatar, ya koma Inter Miami a shekarar 2023 bayan ya kammala kwantiraginsa da Paris Saint-Germain.
- Kafar Italy ɗaya ta kai FIFA World Cup 2026
- Mbappé na dab da kai wa Giroud a yawan cin ƙwallaye a France
Tun bayan komawarsa, Messi ya taka rawar gani sosai, inda ya zura ƙwallaye sama da 80 tare da bayar da taimako da dama a ƙungiyar.
Wannan shi ne karo na biyu da ake sanya sunan Messi a wani ɓangare na filin wasa, bayan ƙungiyar Newell’s Old Boys ta yi hakan a watan Yuni na 2025 — ƙungiyar da ya fara taka leda tun yana ƙarami.
A kakar da ta gabata, tsohon ɗan wasan FC Barcelona, wanda ya lashe Ballon d’Or sau takwas, ya ci kyautar fitaccen ɗan wasa a gasar MLS karo biyu a jere.
Tun bayan zuwansa, Inter Miami — ƙungiyar da David Beckham ke da hannu a mallakarta — ta zama ɗaya daga cikin ƙungiyoyin da suka fi jan hankali a gasar MLS.