Kocin Jamhuriyar Czech, Jaroslav Silhavy ya sanar da yin ritaya ranar Litinin, bayan da kasar ta samu gurbin shiga Euro 2024.
Jamhuriyar Czech ta doke Moldova 3-0 ranar Litinin ta kuma samu gurbin da za ta buga gasar da Jamus za ta karbi bakunci a badi.
Kociyan mai shekara 62 ya sanar da yin ritaya a wata kafar talabijin ta Czech, lokacin da ake hira da shi bayan tashi daga wasan.
Silhavy ya karbi aikin a 2018, wanda ya kai kasar quarter finals a Euro 2022, amma ya kasa samun shiga kofin duniya a Qatar a 2022.
Kociyan na shan caccaka kan kasa taka rawar gani a rukuni na biyar, wadda ta yi ta biyu, biye da Albania, bayan da ta ci wasa hudu daga takwas da ta fuskanta..
Haka kuma an samu rashin jituwa a cikin tawagar Czech a makon jiya, bayan da aka umarci mai tsaron bayan West Ham, Vladimir Coufal da wasu ‘yan wasa biyu su koma gida, bayan da suka kwana a gidan rawa ranar Asabar.
